Мыйын авий комбым шуко ий онча. Мыят тудлан полшем. Комбо игыже-влакым май покшелне пӱктен луктеш. Авий иге-влакым пӧртыштӧ кужун ок кучо, уремыш луктын колта. Нуно ужар шудышто коштыт, мый оролем. Ик йӱран кечын комбо ден игыже-влакым изи пӧлемеш кодышна. Кӱвареш газетым шарышна, кочкашышт шындышна. Кугу пӧлемыш ынышт лек манын, теҥгыл-влакым вераҥдышна, тудым пальто дене петырышна.
Школ гыч вашке тольым. Вигак изи йолташем-влак деке ошкыльым. Изи пӧлемыште шарыме газет изишат амырген огыл. Кугу пӧлемысе кӱвар тичмашнек лавыран. Ик ару верат кодын огыл, манаш лиеш. Комбо ден игыже-влак нигуштат огыт кой. Кушто гына мый нуным шым кычал: кудывечыште, пӧрт-йымалне, уремыште – комбиге-влак нигуштат уке улыт. Пӧлемыште шогем, комбиге-влакым кычкырем:
– Рига-рига, рига-рига, рига-рига.
Ик комбиге ваштарешем куржын тольо.
– Кочмет шу-эш? Эн чот тый шуженат? Ала кампетке дене тыйым сийлаш? – ойлем тудлан да тунамак кӱсенем гыч кампеткым шуялтем. Комбигат йӱкым пу-ыш. Тудын почеш моло иге-влак толын шуыч. Мый нунын кушеч лекмыштым шекланышым. Ава комбо кок шкаф кокласе аҥысыр верышке пурен шинчын: кугыжанватыла веле коеш. Туштак игыже-влак лийыныт. ӧрмаш, кузе тушко шы-ҥеныт? Молан йӱкым пуэн огытыл? Ава комбым ончен, ятыр жап воштыльым.
Иге-влакым пукшышымат, кӱварым мушкым. Авий толмеке, радамын каласкалышым. Тудат комбын кок шкаф коклаш шыҥымыжлан ӧрын. Эрлашыжым школышто йолташем-влаклан ойлышым. Нуно комбо ден игыже-влакым мокталтышт:
– Шулдыран йолташет-влак арулыкым йӧратат. Кугу пӧлемым амыртен пытарымеке, кок шкаф коклашке ару верым кычал пуреныт. Але ава комбо игыже-влакым тушман деч шылтен.
Эльвина АПЛЕКАЕВА.
Пошкырт, Караидель, Ӱткӱстӧ.
Ф.ЛЕБЕДЕВАН сӱретше.
