Эше ожнак ача-ава, коча-кова, ялысе кугыеҥ-влак икшыве-шамычым сай ден осалым палаш туныктеныт. Мом ышташ лийме, мо уда нерген каласкаленыт. Тыге ик тукым гыч весыш ойӧрӧ-влак аралалт кодыныт. Кызытат мыланна тидын нерген ойлат. Мыланемат авам тыге каласен: «Ӱстембалан упшым, пижым кодыман огыл, оксат огеш лий. Ӱстембалым кагаз дене ӱштман огыл, ешыште вурседылмаш ылыж кертеш».
Нине ойӧрӧ-влак ожнак шочыныт гынат, кызытсе илышланат моткоч келшат. Тыгай ойсавыртыш-шамыч калыкын мудреч улмыжым палемдат.
Виктория ИВАНОВА.
Морко, Коркатово.
