Усталык чын корным ончыкта

14-18 февральыште Марий Элыште «Молодые профессионалы» (WorldSkills Russia) X открытый регионысо чемпионат эртаралтеш. 360 участник (нунын коклаште – 37 юниор) 7 профессий дене усталыкшым терга. 14-16 ияш юниор-влак кермычым опташ, предпринимательын пашажым лончылаш, бизнеслан программым келыштараш, парикмахерын мастарлыкшым ончыкташ, электромонтажым ышташ тӱҥалыт. Школьник-влаклан ончыкылык профессийым чын ойырымо нерген программе лиеш. Тыгодым таҥасымашлам онлайн ончен кертыт, онлайн мастер-класс-влак, республикысе колледж ден техникумла гыч виртуальный экскурсийла темлалтыт.

Сеҥыше-влак майыште Саранскыште (Мордовий) эртаралтше «Молодые профессионалы» X Национальный чемпионатын финалыштыже таҥасаш тӱҥалыт.