Кугезе коча-кована-влак Кугу Ачамланде сар годым мыланна тынысле кавам арален коденыт. Ме, самырык-шамыч, нуным порын шарнен, пагалымашым ончыктена. Теве Шернур район Кукнур школышто тунемше-влак сар дене кылдалтше тӱрлӧ кидпашам ыштат. Нуным Шернур посёлкысо йоча усталык пӧртын туныктышыжо В.П.Алгаев туныкта.
– Мый «Витражная роспись», «Резьба по дереву», «Художественная лепка» кружоклам вӱдем. Тений сар темылан кугу тӱткышым ойырена. Йоча-влак дене панном, шкатулкым, телефонлан подставкым, сувенирым, холодильникыш пижыкташ келыштарыме поделке-шамычым ямдыленна. Тыгай сомыллан йоча-влакым коча-кова-шамычын шарнымашышт, ача-аван каласкалымышт таратат. Тунемме годым, книгам лудын, кином ончен, шуко кӱлешан уверым пален налынна, – ойла Валентин Петрович.
Эше тунемше-шамыч дене сар жапысе техникым шинчалан руаш гыч ненчат. Танк ден самоходко-шамыч гыч «Танковое сражение» композицийым тӱшкан келыштареныт. 2-шо классыште тунемше-влак Костя Мамаевын, Саша Быковын, Варвара Танерован, Ульяна Кучергинан тыршымыштлан кӧра сӧрал паша шочын. Нылымше классыште тунемше Богдан Быков ветеранлан сувенирым ыштымыж дене ӧрыктарен. Рвезе пу гыч Сеҥымаш орденым пӱчкын луктын да подставкыш моторын шогалтен.
– Кугу Ачамланде сарыште Сеҥымашлан 80 ий теммылан пӧлеклалтше тӱрлӧ ончер Кукнур школыштат, верысе тӱвыра пӧртыштат, Шернур посёлкысо йоча усталык пӧртыштат эртаралтыныт. Тушто тунемше-влакын эн сай пашаштым ончыктенна, – ойла Валентин Петрович.
Уста туныктышын да ӱдыр-рвезе-шамычын шонымашышт ятыр. Усталык пашаште сеҥымашым тыланена!
Христина АЛЕКСАНДРОВА.
Фотом школ архив гыч налме.
