Йоча-влак, те телевизорым изи годсек ончеда. Вӱдышӧ-влакын сыныштым, сылнын кутырымыштым, камер ончылно шкем чаткан кучымыштым эскереда. Тенданат нунын гай лияш кумыл лектын, очыни. Йошкар-Оласе «Promo Point» видеопродакшн студий пелен Телевидений школ пашам ышта. Тудым самырык рвезе А.В.Самоделкин вуйлата (снимкыште йоча-влак дене).
– Кызыт кажне гаяк ӱдыр-рвезын социал кыллаште блогшо уло. Нуно телефонышт дене тӱрлӧ оҥай видеом войзат. Ме тидым профессионал семын ышташ туныктена, – ойла Алексей Васильевич.
Телевидений школышко 8-17 ияш кажне кумылан еҥ толын кертеш. Тушто ончыкылык вӱдышым, тележурналистым але блогерым куштат. Самырык еҥ-влакым камер дене пашам ышташ, тудын ончылно шкем кучаш, лӱдмашым кораҥдаш, йылмым лывырташ туныктат. Тылеч посна видеолан сценарийым возат, монтажым шкеак ыштат. ™дыр-рвезе-шамыч эн ончыч вӱдышӧ, корреспондент семын «модыт»: передачын унажлан йодышым ямдылат, икте-весышт деч интервьюм налыт. Операторын сомылжым шкеак шуктат. Икманаш, чылажат телевиденийысе гай.
– Лишыл жапыште марий группым погаш шонена. Олаште марла кутырышо икшыве-влак ятырын улыт. Мемнан деке районлаште илыше-шамычат ушнен кертыт, – ойла А.Самоделкин.
Тале телевӱдышӧ але блогер лийнеда гын, вашкыза!
Войзалташ вожылыда але лӱдыда гын:
•Лыпланыза. 6-10 гана нер дене кугун шӱлалтыза.
•Камерышке ончыза да шинча ончылныда калыкым сӱретлыза. Ончылнем йолташем шинча, да кызыт тудын дене кутырем манын шоныза.
•Шомакым йоҥылыш ойлымо деч ида лӱд. Ситыдымашым программе полшымо дене тӧрлаш лиеш. Адакшым шагалын шӱртньыде ойлен кертыт.
•Каласкалымыда годым илышыште лийше оҥай тат-влакым шарналтыза да шыргыжса.
•Чоным пыштен мутланеда гын, ситыдымашдам нигӧ огеш шеклане.
