Виче кундем Пыжанью район Вӱлэҥер школышто марий йылмым шочмо йылме семын тунемыт гынат, ӱдыр-рвезе-влак чылан яндарын кутырен огыт мошто. 3-шо классыште тунемше Аня Тесмеева (снимкыште) моткоч куандарыш. Тудын дене вашлийын мутланыме годым чылт марла кутырыш. – Мый изинек марий мурым мураш йӧратем. Такмак-влак поснак келшат. Тунам калыклан оҥгыр гае йӱкан улметым палдарен, куштен моштыметым ончыктен кертат. Тыгак Надежда Васканован репертуарже гыч «Кидыштемже пеледыш аршаш» муро чонемлан лишыл. Авамат Елена Геннадьевна марий семлан кумылан. Южгунам коктын муралтена, – ойла ӱдыр. Аня школышто эртаралтше мероприятийлаште да Виче кундемысе марий тӱвыра рӱдерын концертлаштыже марла да рушла мура. Вӱлэҥер ялышке унала мийымына годым марий ӱдыр «Лач пырляште весела» концертыште марий такмакым йоҥгалтарыш. Сценыште шкенжым чылт артистлак кучыш: йӱкшӧ яндар, капкылже лывырге. Аня ончыкыжым артист лийнеже. Икмыняр ий гыч Вӱлэҥерын шӱшпыкшым кугу сценыште ужына манын ӱшанена.
Х.ТОКПУЛАТОВА.
