31 март гыч 3 апрель марте Йошкар-Олаште «Михаил Мурашко йолташыже-влакым ӱжеш» тӱнямбал фестиваль-конкурс луымшо гана эртаралтын. Тушко Российын 25 регионжо гыч куштышо коллектив-влак чумыргеныт. Тений фестиваль-конкурс Михаил Мурашкон 80 ияш лӱмгечыжлан да усталык корнышто 60 ий тыршымыжлан пєлеклалтын. Ты гана кугу тӱткышым марий калыкын куштымашыжлан ойыреныт.
Ныл кечаш фестиваль ик шӱлыш дене эртен. Кажне коллектив шке сымыктышыж дене палдарен да вес калыкын куштымашыжым ончыктен. Теве Шернур посёлкысо «Ласточка» вокально-хореографический ансамбль ныл куштымашым аклымашке луктын. Кыдалаш группыш коштшо ӱдыр-влак «Чибатуха», «Тропинка» куштымашла, а кугурак ийготан-шамыч «Луй модеш» да руш калык куштымаш-влак дене куандареныт. Кыдалаш группыш коштшо-шамыч шке таҥашышт-влак коклаште сеҥышыш лектыныт. Нунылан икымше степенян дипломым кучыктеныт. Вуйлатышышт – В.Н.Ешпатрова.
– Куштымаш – илышнан ик весела татше. Ме кажне конкурсыш кумылын ушнена. Куштымашыш уло чоннам пыштен, шонымашнам жюри да ончышо-влак дек намиен шукташ тыршена, – ойлат ӱдыр-влак.
