Вашлиймаш кумылаҥда

Шуко йоча изирак класслаште тунеммыж годымак шканже келшыше ончыкылык профессийым ойыра. Южышт кугурак класслаштат кӧ лийме нерген огыт пале. Йошкар-Оласе «Лира» йоча сымыктыш школышто тунемше-влак пиалан улыт. Нуно изинек профессиональный шинчымашым налыт. Кажныже сӱретче, мурызо, куштызо, семӱзгарым шоктышо огеш лий гынат, сымыктышым умылаш, тудым вес шинча дене ончаш тӱҥалеш. Йоча-влак чын корным ойырышт манын, выпускник-шамыч дене вашлиймашым ий еда эртарем. Шукерте огыл «Кушко тунемаш каяш?» художественный унагудыш студент-влакым ӱжынам. Нуно кидмастар, дизайнер, ИЗО-м туныктышо лияш ямдылалтыт. Ӱдыр-шамычын «Ме тиде профессийлан сӱретче, ожнысо выпускник-влак дене вашлиймаш деч вара утларак кумылаҥынна» манын ойлымыштым колаш куанле лийын. Тугеже паша арам огеш ышталт.

А.В.ВОЛКОВА.