Тула кундемысе «Шахтёр» парк-отельыште йоча команде-влакын всероссийский КВН фестивальышт мучашлалтын. Тудо латнылымше гана эртаралтын. Тушко Российысе 60 регион да Беларусь Республик гыч 145 усталык коллектив ушнен. Марий Элын чапшым «Мультискилл» ден «Дети Марий Эл» команде-шамыч араленыт. Нуно чолгалыкышт дене ойыртемалтыныт да кокымшо турыш лектыныт. «Дети Марий Эл» команде всероссийский КВН-ын Юниор-лигыштыже мастарлыкшым тергаш тӱҥалеш, а «Мультискилл» – «КВН Дети» телепроектын у сезоныштыжо.
Палемдыман: йоча-влаклан кугу сценыш лекташ полышым Марий Эл Республикысе Самырык-влак политике комитет пуэн. «Молодёжь и дети» национальный проектым илышыш шыҥдарымаш ӱдыр-рвезе-шамычлан ты кӱкшытыш шуаш йӧным ыштен.
Катя СЕРГЕЕВА ямдылен.
Фотом «ВКонтакте» соцкылысе «КВН Марий Эл» тӱшка гыч налме.
