Июньышто школ пелен лагерь пашам ыштен. Тудо коло ик кече шуйнен. Кумло йоча коштын (снимкыште), нунын радамыште мыят лийынам. Кажне эрдене зарядкым ыштенна, куржталынна. Эр кочкыш деч вара воспитатель-влак тӱрлӧ мероприятийым эртареныт, туныктеныт. Вӱд воктене, корнышто, янлык-влак дене вашлийме годым шкем кузе кучаш кӱлмӧ нерген палдареныт.
Походыш мийыме ик эн куанле лийын. Лишне улшо эҥерым, пӱям, коремлам шымленна. Арулык нергенат монден огынал. Кумдыкым куштыра деч эрыктенна. Ик кечын Агрыз олашке экскурсий дене миенна. Бассейныш пуренна. «Кичке-Тан» заказникыште шордо ферме шарнымашеш кодын. Тылзе жапыште ме шер теммеш каненна да капнам шуаренна.
Максим УСМАНОВ.
Татарстан, Агрыз, Буймо.
Фотом школ архив гыч налме.
