«Артек» тӱнямбал йоча рӱдерыште «Кугу перемене» всероссийский конкурсын финалже лийын. 9-11-ше класслаште тунемше 600 ӱдыр-рвезе сеҥышыш лектын. Нунын коклашке Марий Эл гыч вич тунемше логалын: Йошкар-Оласе Бауман лицей гыч Маргарита Жирова (10-шо кл.), Булат Юсупов (11-ше кл.) (снимкыште), Экономико-правовой лицей гыч Диана Москвина (10-шо кл.), 28-ше номеран лицей гыч Тимур Хабибуллин (11-ше кл.), Волжск оласе А.С.Пушкин лӱмеш 9-ше номеран школ гыч Маша Назарова (10-шо кл.). 11-ше классыште тунемше-влаклан шинчымашым налашышт 1 миллион теҥге дене пуэныт, 9-10-шо класслаште тунемше-шамычлан – 200 тӱжем теҥге дене. Выпускник-влаклан вузышко тунемаш пурымо годым баллым ешарат.
