Пеш ожно Арменийыште Арам лӱман кугыжа илен. Ик тале кредалмаште тудо ассирийский кугыжа Носор деке пленыш логалын.
– Лу кече кинде деч посна шинче. Латикымше кечын тый денет шке кредалаш лектам. Сеҥет гын, калыкет деке колтем да шергакан пӧлекым ыштем, – ойлен тушман.
– Келшем. Лач ик йодмашем лиеш: калыкем деч йӧратыме кӱртньӧ тувырем йодын кондыза, – вашештен Арам.
Тушманын тарзыже-шамыч корныш тарваненыт. Армян-влак тиде йодмаш арам огыл улмым вигак умыленыт да чиемыш лавашым шылтен колтеныт.
– Тидын деч моторрак кӱртньӧ тувырым кондыза, – вес кечын Арам йодын. Носор тарзыже-шамычым армян-влак дек уэш колтен. Тыге нуно тышке-тушко лу кече коштыныт да, палыде, Арамлан вичкыж киндым нумалыныт.
Латикымше кечын Арам ден Носорын кредалмашышт лийын. Армян кугыжа сеҥен. Шочмо кундемышкыже пӧртылмеке, Армений мучко кинде олмеш лавашым кӱэшташ йодын.
Оля МАЙКОВА ямдылен.
Сӱретым нейросеть полшымо дене ыштыме.
