Йошкар-Оласе «Виктория» музыкальный театр, «Семья» национальный проектын «Семейные ценности и инфраструктура культуры» федерал проектше почеш Российысе тӱвыра фондын грантшым сеҥен налмеке, «Мир после войны» спектакльым шынден (снимкыште). Тудым шукерте огыл калык ончыко луктын.
Спектакль-триптих Л.Н.Толстойын «Война и мир», М.А.Шолоховын «Судьба человека» да «Мир и Жизнь в новых регионах России» произведенийла почеш шочын. Режиссёр Анжела Тихонова, хореограф Анна Кузнецова ты проектым вуйлатыше Виктория Козицынан шонымашыжым калык дек устан намиен шуктеныт. Спектакльыште «Виктория» театрыш коштшо 9-16 ияш 30 ӱдыр-рвезе да специальный военный операцийыште улшо салтак-шамычын латвич икшывышт модыт.
– Йоча-влак шочмо кундемыштын историйжым сайын палышаш, кугезына-шамычын арален кодымо тыныслыкын да эрыкын акыштым умылышаш улыт. Лач тыгай спектакль-влак чоныш патриот шӱлышым утыр шыҥдарат да Шочмо эл дене кугешнаш таратат. Триптих пластический сынан: изи артист-шамыч спектакльын шонымашыжым утларакше куштымаш гоч ончыктат. Эше ты проект – спецоперацийыште улшо салтак-влакын ешыштлан шкешотан эҥертыш, – ойла В.Козицына.
Христина АЛЕКСАНДРОВА ямдылен.
Фотом театрын архивше гыч налме.
