«Детская киностудия» ушем Красногорский йоча усталык пӧрт пелен 2022 ийыште «Образований» национальный проектын «Успех каждого ребёнка» федерал проектше почеш почылтын. Вуйлатышыже – Алёна Викторовна Вилявина (снимкыште Роман Чернов, Паша Ефремов да Никита Рябчиков дене пырля). Киностудийыш посёлкысо икымше ден кокымшо номеран школласе 11-14 ияш латвич йоча коштеш.
Студийыште паша эре гӱжла: икте камерым тӧрлата, весе сценарийым воза, кумшо войзымо видеоматериалым монтироватла. Жапын-жапын йоча-влак паша верыштым вашталтат да йолташыштын сомылжылан тунемыт. Тыгодым кажныже у шинчымашым налеш. Ныл ий жапыште ӱдыр-рвезе-шамыч тӱрлӧ сынан материалым ямдыленыт: стоп-моушен мультфильмым, школысо да посёлкысо илыш нерген репортаж шамычым, социальный йодыш-влакым тарватыше, саламлыме, муро роликлам да моло оҥай видео-влакым. Калык коклашке лектын, йоча-шамыч лӱмлӧ да пагалыме ятыр пошкудышт нерген каласкаленыт.
– У пашам тӱҥалме деч ончыч погынымашым эртарена. Икшыве-влак шонымашышт дене пайлалтыт. Сомылым икте-весе коклаште шеледымеке, шушаш видеон кажне ужашыже нерген кутырена. Паша шуко: йӧнан ракурсым кычалман, фоным келыштарыман, интервьюм налме шотышто кутырен келшыман, йодыш-шамычым ямдылыман. Войзымо деч ончыч репетицийым ыштена. Умбакыже монтажёрна-влак, материалым пӱчкеден, видеом мучаш марте шуктат, – паша радам дене палдара Алёна Викторовна.
Ямде видеом самырык репортёр-влак «ВКонтакте» соцкылысе Красногорский Йоча усталык пӧртын тӱшкашкыже вераҥдат. Кыртмен ыштыме паша аклалтде ок код. Йоча-шамыч регион да калык кокласе конкурслаште ончыл верым наледат, шочмо посёлкыштын лӱмжым кӱшнӧ кучат.
Катя СЕРГЕЕВА.
Звенигово район.
Фотом киностудийын архивше гыч налме.
