Йошкар-Олаште И.С.Палантай лӱмеш тӱвыра да сымыктыш колледжын Национальный сымыктыш гимназийыштыже эртаралтше Марий самырык тукым слётышто икымше гана лийынам. Кумшо лужашке логалынам. Лужавуйна ончыкылык артистке Дарья Юрьева лийын. Моло лужа деч канде тӱсан футболко дене ойыртемалтынна, чылт торгавуйла (василёк) койынна (снимкыште).
Кажне кече мероприятийлан, вашлиймашлан, экскурсийлан поян лийын. Эн кӱлешанже – проект паша. Тачысе кечын тудым чын возен моштет гын, кугу кӱкшытышшуын кертат. Тоштерлашке коштмо ушеш келге кышам коден да илышым вес могырым ончалаш таратен.
Ӱдыр-рвезе-влак чылан чолга лийыныт. Кажныжын – ойыртемалтше койыш-шоктышыжо, мастарлыкше, йылме ойыртемже. Но мемнам икте ушен – ме чыланат марий йылмынам йӧратена да марий улмына дене кугешнена. Вес ийынат слётыш каяш кумыл уло. Тек ты волгыдо пагыт кужу жап чонем ырыкта!
Юлия ЯГОДАРОВА.
Советский, Кельмаксола.
Фотом еш архив гыч налме.
