1941-1945 ийлаште Кугу Ачамланде сар жапыште кугезе коча-кована-влак тыныс верч, илышыштым чаманыде, шочмо элым араленыт. А таче уныкашт-влак, нунын подвигышт курымешлан ынышт мондалт манын, уло кумылын тыршат. Школлаште, колледж ден техникумлаште, университитетлаште тунемше ӱдыр-рвезе-влакым «Сеҥымашын волонтёржо-влак» российысе мер толкын ушен. Тудо 2015 ийыште Сеҥымашлан 70 ий темме вашеш почылтын.
«Сеҥымашын волонтёржо-влак» российысе мер толкынын Марий региональный пӧлкан председательже Л.В.МУЗУРОВА толкынын могай шонымаш дене шочмыж нерген каласкалыш: «Волонтёр паша гоч Кугу Ачамланде сарын геройжо да участникше-влак нерген шарнаш, самырык тукымым шочмо элым йӧраташ туныктена».
Волонтёр-влак куд направлений дене пашам ыштат:
«Кугу сеҥымаш» (Сеҥымаш парад, Бессмертный полкым, «Георгиевский тасма», «Шарнымаш сорта», «Сеҥымашын уныкаже-влак» акций-влакым эртараш полшат; шарнымаш верлам, сарзе-влакын шӱгарыштым эрыктат.)
«Тукым кыл» (Поро кумылым ончыктышо «Тукым шарнымаш» фонд дене пырля «Йошкар гвоздике» акцийым эртарат. Акцийыште погынышо окса дене ветеран-влакым эмлат. Тыгак ветеран-влаклан сурт сомылкам ышташ полшат, нунын дене вашлийын кутырат, шарнымашыштым видеош войзат.)
«Мыйын сеҥымашем» (командым чумыраш, тудын дене пашам ышташ, кугу проектым возаш да молыланат тунемыт.)
«Мемнан сеҥымашна-влак» (Уш-акылым тергыше «РИСК» модыш, квест-влак полшымо дене герой-шамыч да элнан сеҥымашыже нерген каласкалат.)
«Мыйын историем» («Родо-тукым нерген кушто пален налаш лиеш?», «Могай архивыште кычалаш?», «Йодмашым кузе чын возаш?», «Мӧҥгыштыда аралалтше документ-влак гоч мом пален налын кертыда?» да моло йодыш-влаклан волонтёр-влак вашмутым пуэн кертыт.)
«Медиа сеҥымаш» (статья-влакым возат, фотом ыштат, видеош войзат, социал вотлаште группым да лаштыкым вӱдат.)
Кӧ волонтёр лийын кертеш?
Официал сайтын йодмыж почеш, 14 ияш да кугурак ӱдыр-рвезе-влак ушнен кертыт. Но тыгодым кажне кумылан йоча шке вийжым пыштен кертеш.
«Сеҥымашын волонтёржо-влак» российысе мер толкыныш кузе ушныман?
Волонтёрыпобеды.рф сайтыш пурен, йодмашым пуыман.
Ӱмаште Россий мучко 200 тӱжем утла волонтёр, 838 штаб пашам ыштен, 67060 вашлиймаш эртаралтын. Марий Элыште 100 наре ӱдыр-рвезе ушнен.
