«Ик янлыкым утарымет дене тӱняште нимо огеш вашталт, но янлыкын тӱняже, мутат уке, вашталтеш», – маныт калыкыште. Тиде ойым Советский район Роҥго школын 9-ше классыштыже тунемше Софья ТРОНИНА сайын умыла. Шукерте огыл ик чывын шулдыржо пудыргымым ужын да жапым шуйкалыде эмлаш пижын. Эсогыл тудым бинт дене пӱтырен.
– Коча-ковам дене илыме годым вольыкым йӧраташ тӱҥалынам. Тунам ушкалым, презым, ка-зам, шорыкым, чывым, лудым, комбым ашненна. Чыве-влак мыйым поснак паленыт. «Акаштым» ужытат – куржын мият ыле. Нуным кидышке налын пукшенам. Авамын каласкалымыжым шарнем: кум ияш улмем годымак казам вашлияш кӱтӱшкӧ шкетын коштынам, – ойла ӱдыр.
София коваж дек каныш кечылаште кызытат уналыкеш мия. Вигак вӱташке вашка: изи презым, казавачам онча.
Тронинмыт шкешт чывым гына ашнат, кеҥежлан бройлер чывигым да лудым налыт. Ӱдыр нуным авашт семын ончаш тырша, воктечышт ынеж кораҥ: пареҥгым шолта, нужым тӱя, эскера, тазалыкышт верч тургыжлана.
– Он-чыкыжым ветеринар лияш шонем. Мый вольыкым пеш чаманем. Черланат гын, айдеме семын каласен огыт керт, садлан жапыштыже шекланен шуктыман. Мый эмлаш кумылан улам, – ойла София.