Чыла пагыт кокла гыч эн чот кеҥежым йӧратем. Арам огыл пеледыш тылзыште шочынам, вет тунам пӱртӱс ужарга, тӱзлана, сылнештеш. А эше ты жапыште тунемше-влакын вучымо кеҥеж канышышт тӱҥалеш. Книгам, тетрадьым ӧрдыжкӧ шӱкалын, кече мучко лишыл еҥ, йолташ-влак дене жапым пырля веселан эртараш лиеш. Уремыште волейбол, футбол, баскетбол да тулеч моло дене модаш сай йӧн уло.
Кеҥежым еш дене пӱртӱсыштӧ жапым эртараш йӧратена. Олыкысо пеледыш коклаште чоным кандарена да куандарена. Телылан тӱрлӧ эм да чай шудым ямдылена, снегым, модым погена. Ер ден эҥер воктенат каналташ огына мондо. Эн чот Яльчик ер воктене канаш келша. Изи шӱжаремат тиде пагытым моткоч йӧрата. Мӧҥгыштӧ нимыняр шинчымыже огеш шу. Эре уремыш лекнеже, оласе паркыште модын куржталнеже. Садлан ача-авана мемнам тыгай сылне верыш чӱчкыдын коштыктат. А ме йывыртен, модын, воштыл жапым пырля веселан эртарена.
София ТИМОФЕЕВА.
Волжск ола.
