22-24 июльышто Мордовий Республикын рӱдолашкыже, Саранскыш, «Я в Агро» всероссийский конкурсын финалышкыже элнан тӱрлӧ кундемже гыч 500 утла ӱдыр-рвезе погынен. Школышто тунемше, студент, ялозанлыкыште пашам ыштыше, агроблогер, ялысе амалкалче-влак ялозанлыкын ончыкылыкшо нерген кутыреныт. Нунын коклаште «Выбирай будущее» направлений дене мыят лийынам. «Агротехклассы» профильыште шинчымашнам кудло кумытын келгемденна. Ме лекцийым колыштынна, кейслан вашмутым кычалынна, проектым араленна. Мый «Пеледалтше шарнымаш» проектем дене палдаренам. «Лидер — это не громкий голос: качества, которые важнее харизмы», «Как найти союзников: с чего начинается команда» туныктымо программе-влак, тӱрлӧ мастер-класс ушеш келге кышам коденыт. Саранск ола мучко экскурсият моткоч келшен.
Ача-авамлан, класс вуйлатыше И.Г.Порфирьевалан ӱшанле эҥертыш улмыштлан кугу таум ойлем.
Полина ЩЕГОЛЕВА.
Марий Турек школ.
Фотом еш архив гыч налме
