Марий Элыште черетан агроклассым Волжский район Пӧтъял школышто почыныт. Палемден кодыман, 2027 ий марте республикыште 38 школышто тыгай класс лийшаш. Ты сомыл «Технологическое обеспечение продовольственной безопасности» нацпроектын «Кадры в АПК» федерал проектшылан кӧра илышыш шыҥдаралтеш.
Пӧтъял школысо агроклассыште 7-11-ше класслаште тунемше-влак ушакылыштым пойдарат. Агрокласс дене Йошкар-Оласе аграрный колледж, Юл кундем кугыжаныш технологический университет да «Овощная лагуна» ялозанлык кооператив кылым кучат. Нуно икой дене ончыкылык ялозанлык пашаеҥ-шамычым ямдылат. Йоча-шамыч тӱрлӧ предметым келгын тунемыт, ялозанлык кооперативыште практикым эртат. Ӱдыр-рвезе-влак кеҥеж мучкат «Овощная лагунышто» пашам ыштеныт. Кооперативым вуйлатыше А.В.Пушкин Шинчымаш кечын ойыртемалтше тунемше-шамычлан Таумутым кучыктен.
У тунемме ий тӱҥалмеке, йоча-влаклан ялозанлык предприятийыште икымше практик занятийым эртареныт. Нунылан Наталья Пушкина киярым теплицыште да петырыдыме кумдыкышто куштымо нерген каласкален, экскурсий лийын. Йоча-влак киярын молан лач ужар тӱсан улмыжым пален налыныт.
Агроклассын лектышыже икмыняр ий гыч раш палдырна. Тидлан йоча-шамычат, кугыеҥ-влакат ӱшанат.
Нина ВАСИЛЬЕВА.
Фото-влакым школ архив гыч налме.
