«Пӧръеҥ – ешын эҥертышыже, аралышыже, ончыкылыкшо, ӱшанже», – маныт калыкыште. Чынак, пӧръеҥ суртым куча, ешыже улан, сайын илыже манын, чыла йӧным кычалеш. Эрге ешын лӱмжым арален кода, тукым гыч тукымыш куснышо йӱлам умбакыже шуя. Шернур район Тоски ялыште илыше Медведевмытын самырык ешыштышт (снимкыште) кум ончыкылык пӧръеҥ кушкеш.
Кум патыр
Андрей Евгеньевич ден Екатерина Юрьевнан ешым чумырымыштлан – латныл ий. Ава Мустай школышто директорын воспитаний шотышто советникшылан пашам ышта. Тыгак школысо книгагудым вуйлата, «Движение Первых» толкынын кураторжо. Ача Шернур посёлкысо 29-ше номеран пожарно-спасательный частьыште караул вуйлатышын сомылжым шукта. Нунын пиалышт – кум патыр: Егор, Дамир, Захар. Койыш-шоктышышт дене ойыртемалтыт гынат, икте-весышт дене келшен, вашла полышкален илат.
Егор 6-шо классым тунем пытарен. Тудо усталык шӱлышан, творческий конкурслаште мастарлыкшым чӱчкыдын терга. Школышто эртарыме мероприятий ден конкурслаште чолгалыкшым ончыкта. Аваж дене пырля тӱрлӧ теме почеш проект пашам изинек воза да сеҥыше радамыш лектеш. Россий МЧС-ын Марий Элысе тӱҥ виктержын эртарыме Элым аралышын идалыкшылан пӧлеклалтше конкурсышто почеламутым сылнын лудмо, «Герой в моей семье» сочинений-эссем возымо таҥаслаште ончылно лийын. Мустай школым тунем пытарыше да специальный военный операцийыште улшо-шамыч нерген уверым идалык мучко аваж дене пырля погеныт да проектым возеныт. Тыге школ тоштерым пойдареныт. Егор – эше чолга волонтёр, «Движение Первых» толкынын участникше. Изиж годым ачажын корныжым тошкаш шонен, кызыт коваж гай туныктышо лийнеже.
Дамир 5-ше классышке вончен. Тудын койыш-шоктышыжо шыма, но тыгодым моткоч виян, писе, чолга. Рвезе спорт дене пеҥгыде кылым куча, футбол дене сайын модеш. Мустай школын чапшым команде дене чӱчкыдын аралат. Спортивный ориентирований дене шуко медаль ден грамотшо улыт. Ончыкылык илышыжым спорт денак кылдаш шона. Вич ияш Захар школ пеленысе йочасадыш коштеш. Изаже-влак деч шукылан тунемеш.
– Ме кызытсе самырык еш семын, йоча шочмеке, эн ончыч рушла кутыренна. Вара шонымашна вашталтын, да марла кутыраш кӱлмӧ нерген умыленна. Ынде ешыште марла мутланена, марий мурым колыштына, марий книгам лудына. Пытартыш жапыште икшывына-влакым марий спектакльлашке коштыктена, – ойлат ача-ава.
– Ме пелашемын ачаж ден аваж дене пырля илена. Нунылан уныкаштын чонышкышт марий шӱлышым шыҥдараш полшымыштлан кугу таум ойлем. Марий пайрем йӱла дене изинек палдарат, – ешарыш Екатерина Юрьевна.
Жапым пырля эртарат
– Еш дене жапым пырля эртарыме шотышто ойлаш гын, мый ава семын тидлан кугу тӱткышым ойырем, молан манаш гын йоча-влак моткоч чот писын кушкыт. Нунын дене кутырымо, шонымашыштым палыме, вашталтмыштым эскерыме шуэш. Еш йӱланат уло. Кандаш ий почела июньышто Виче кундемыш Виче эҥер серыш йолташ, родо-влак дене пырля канаш коштына. Палаткыште илена, мурена, куштена, модына, пуш дене ийына, йӱштылына. Тыгак августышто тушкак ик кечылан колым кучаш кудалыштына. Йоча-шамыч тиде жапым моткоч вучат. Паша эре шуко, но икшыве дене жапым пырля эртарымаш – эн тӱҥ, – ойла Е.Медведева.
Медведевмытым районыштат, республик мучкат чолга еш семын шукын палат. Нуно тӱрлӧ конкурсышко тӱшкан ушнат да сеҥышыш лектыт. «Движение Первых» толкынын эртарыме «Моя спортивная семья» республикысе фестивальыште таҥасеныт.
Пашаче улыт
Медведевмыт ялысе моло еш семынак пашам йӧратат. Кугу пакчашт уло. Шорыкым ашнат. Пошкудышт уке, пакчаштышт шӱкшудо ынже куш, чодыраш ынже савырне манын, шудым солат, телылан ямдылат. Рвезе-влак коча-ковашт, ача-аваштлан шӱкшудым сомылаш, вӱдым шаваш, вольыкымат ончаш полшат.
– Ялыште илаш сай, но паша шуко. Ме тиддеч огына лӱд. Кеч-могай сомылым тӱшкан ыштена. Тыге вашкыл эше чот пеҥгыдемеш, – ойлат Медведевмыт.
Христина ТОКПУЛАТОВА.
Фотом еш архив гыч налме.
