Кызытсе саманыште ожнысо семын шым-индеш шочшан ешым шагал вашлият. Туге гынат улыт, вет кугу ешыште кеч-могай пашам лош пайлаш, нелылыкым чактараш куштылгырак. Кугу ешыште икшыве-шамыч пашам йӧратыше, поро, икте-весылан полшаш ямде улшо кушкыт, шонем. Тыгак каласаш лиеш Кужэҥер район Шӱдымарий ялыште илыше вич шочшан Смородиновмыт нерген.
Кажныже мастар
Юрий Алексеевич ден Олеся Николаевнан ушнымыштлан – латкуд ий. Суртоза Москошко чоҥымо пашашке кудалыштеш, озавате верысе фельдшер да акушер пунктышто санитаркылан ышта. Ача ден аван куанышт – шӧртньӧ гай шерге икшывышт. Эн кугу йоча – Ксения. Тудо верысе школышто 9-ше классыште тунемеш. Чолгалыкшым тӱрлӧ вере ончыкта. Марий эстраде мурылан шӱман. Репертуарыштыже шке мурыжат уло: «Шочмо ял». Тудым Шӱдымарий ялжылан пӧлеклен. Мастарлыкшым концертлаште чӱчкыдын ончыкта. Конкурслашкат ушна. «Россия страна героев» республикысе да районысо конкурсышто ончылно лийын, «Мелодия осени» районысо фестивальыштат ойыртемалтын. Ксения тыгак спорт дене пеҥгыде кылым куча. Волейбол дене талын модеш. Ятыр таҥасымаште эн сай модшо да аралыше семын палемдалтын. ГТО физкультур да спорт комплексын кеҥежымсе фестивальжын икымше йыжыҥыштыже 14-15 ияш ӱдыр-влак коклаште кокымшо верым сеҥен налын. Карина шӱжарже шымше классыш коштеш. Сӱретлаш мастар. Шочмо верысе пӱртӱсын моторлыкшым, кажне пагытын ойыртемжым эскерен, альбом кагазеш «войза». Рома 5-ше классыште тунемеш. Футбол тудын илышыже манына гын, йоҥылыш огына лий. Кажне кечын модаш ямде. Тыгак спорт туризм дене таҥасымаште, ече дене коштмаште вийжым терга да сеҥышыш лектеш. «Лӱдыкшыдымылык орава» районысо конкурсышто икымше полышым пуымо дене эн ончылно лийын. Шочмо
йылмымат моткоч йӧрата. Арам огыл школ йыжыҥыште эртарыме олимпиадыште икымше верым сеҥен налын. Камелия кажне кечын школ пеленысе йочасадыш вашка. Ксения акаж семынак
мураш, тыгак кушташ йӧрата. Кугурак икшыве-влакым ончен, шукылан тунемеш да примерым
налеш. Вич тылзе ончыч Каролина шочын. Кажне кечын ачааважым, иза ден акаже-шамычым куандара.
Паша туныкта
Ялыште кажнылан паша ситышын. Смородиновмыт казам, тагам, кроликым ашнат. Кеҥежым шудым тӱшкан ямдыленыт. Йоча-влакат вольык сомылым ышташ полшат. Пӧртыштат шке пашаштым палат, арулыкым эскерат. Саскам поген, компотым, вареньым шолташ полшеныт. Шыжым поҥго дене «шылын модыт».
«Паша айдемым илаш туныкта» манын, калыкыште арам огыл ойлат. Пашам ыштен, ушат вияҥеш. Тӱрлӧ сомылым шуктен, икшыве-влак шукылан тунемыт, ончыкылык илышлан ямдылалтыт, мутым кучаш, икте-весылан полшаш тӱҥалыт,» – ойла Олеся Николаевна.
Канашат кӱлеш
Смородиновмыт пырля канаш йӧратат. Ӱстембал модыш дене модыт. Когыльым пырля кӱэштыт
да, ӱстел йыр погынен, чайым йӱыт. Тыгодым чоным почын кутырат. Оҥай кином ончат, лончылат, рӱдолашкат коштыт. Яра жап улмо годым конкурслашке тӱшкан ушнат. Кугу еш – кугу пиал. Икте весылан полышкален, икте-весым умылен илымаш, куан ден ойгым лош пайлымаш эн чот шерге. А ялыште яндар юж, мотор пӱртӱс кумылым утыр нӧлтат.
«Тыгай вершӧрыштӧ илаш – кум пачаш пиал», – ойлат вате-марий.
Христина АЛЕКСАНДРОВА.
Фото-влакым еш архив гыч налме.
