Изак-шоляк Матвей ден Кирилл Мустаевмыт дене Шернур район Кугу Мушко ялыште палыме лийна. Нуно шкешт посёлкышто илат. Кеҥеж каникуллан ковашт дек унала толыныт ыле. Матвей 1-ше номеран Шернур школын кудымшо классшым тунем пытарен, Кирилл – латикымшым. Изиракше спортлан моткоч шӱман.
– Физкультур урок эн чот келша. Мемнам Роман Феликсович Кузнецов туныкта. Урокышто уло кумылын куржталына, футбол, баскетбол, волейбол дене модына. Телым ече дене пикшла чымена. Спорт туризм да ориентирований дене таҥасымашлаште вийнам тергена, – ойла Матвей.
Районысо соревнованийлаште сеҥымашыже шагал огыл. Мутлан, йолташыже-влак Максим Вершинин, Павел Созонов дене спорт ориентирований дене «Первоснежник» таҥасымаште кокымшо вер дене палемдалтыныт.
Кирилл изажат капкылжым кажне кечын шуара. Эрдене эрак помыжалтын, зарядкым ышта. Яра жапыште куржталеш.
– Коваланна шудым ямдылаш полшена. Солена, удырена, мотоблок дене шупшыктена, вӱтамбаке кышкена. Тидым ялысе физкультур манаш лиеш. Тылеч посна куржталышташ коштам, – ойла Кирилл.
Рвезе-влак ончыкылык салтак улыт. Спортын кӱлешлыкшым раш умылат да кажне кечын у сеҥымашлан ямдылалтыт.
Ялыште кажне кече – спорт
