Ме, «Ямде лий» газетын пашаеҥже-влак, икверыште огына шинче. Тӱрлӧ школышто вашлиймашым эртарена, йоча-влак дене палыме лийына. Ты гана Йошкар-Оласе 21-ше номеран Семёновка школын 1-ше «Г» ден «Д» класслаште тунемше-влак дене вашлийынна. Нуным О.В.Леонтьева ден Е.А.Соколова туныктат. Ӱдыр-рвезе-влак икымше класслаште веле тунемыт гынат, йоча газет нерген шинчымашышт куандарыше. Ме газет илыш, юнкор паша нерген палдарышна, тӱрлӧ модыш дене модыктышна. Эчук ден Пампалче молгунамсе семынак йоча-влакын кумылыштым нӧлтальыч. Икшыве-шамыч шкешт нерген палдарышт. Юлиана Крылова Морко район Коркатово ялыш унала кошташ йӧратымыж нерген ойлыш. Захар Никишов «Ямде лий» газет редакцийын эртарыме «Кайык ӱстел» фотоконкурсышкыжо ушнен. Газетыште савыктыме фотожым ужмеке, моткоч куанен. Тудым ончен, молат конкурсыш ушненыт. Тыгай вашлиймаш йочалан кӱлешан да пайдале. Ӱжса веле, ме уло кумылын миена!
Ӱжса веле, миена!
