16-20 мартыште Ялысе телымсе спорт модмаш Пермь олаште эртаралтын. Российын 44 регионжо гыч команде-влак ушненыт. Нунын коклаште Марий Элын командыже лийын. Медведево посёлко гыч Чулпан ден Алексей Зуевмыт Диана ӱдырышт дене еш дене таҥасымаште 2-шо верым сеҥен налын. Чулпан – ече дене спорт мастер. Алексей писын куржталеш. Диана куштылго атлетикылан шӱман.
– Ме спорт дене пеҥгыде кылым кучена. Моло спортсмен-влак семынак кеч-могай таҥасымаште сеҥаш тыршена. Кокымшо кече деч вара ӱшанна йомын ыле. Ме визымше лийынна. Еш дене таҥасыме годым чонышто йӧршын вес шижмаш, вес кумыл, кугу адреналин озаланат. Икымше верым налше еш деч ик очколан гына вараш кодынна, – ойлат ача-ава.
