«Иза-шольо йӧратымаш кӱ пырдыж дечат пеҥгыде», – маныт калыкыште. Ака-шӱжар коклаштат кыл тыгаяк ӱшанле. Ӱдыр-влак лишыл еҥыштым 10 апрельыште палемдыме ака-шӱжар да иза-шольо-шамычын кечышт дене саламлат.
Аня СМИРНОВА (Кужэҥер, Салтакъял): «Шӱжаремын лӱмжӧ – Вика. Ме жапым пырля эртарена: сӱретлена, мурена, куштена. Авана кагаз гыч самолёт ден пушым ышта. Вика дене самолётым каваш, пушым шошым йогышо вӱдыш колтена».
Сабрина КИЛПИНЕН (Йошкар-Ола,1-ше номеран гимназий): «Индира акам, Имран изам, Рамзан шольым улыт. Ме келшен илена. Кажне кеҥежым ача-авана дене пырля Москош кудалына. Олан мотор верлажым шымлена».
Лера ФЁДОРОВА (Волжский, Упшер): «Ешыште вич икшыве улына. Ик иза да кум шольо коклаште ик ӱдыр кушкам. Ме икте-весылан урокым ышташ але мӧҥгысӧ сомылым шукташ полшена. Яра жапыште ӱстел модыш дене модына».

Оля МАЙКОВА мутланен.
Авторын фотожо-влак.