Марий Эл Республикысе «Лӱдыкшыдымылык школ» мер толкынын Советский районысо пӧлкажым Наталья Владимировна Шабалина вуйлата. Тиде пашалан Роҥго школышто посна кабинетым почыныт. Тунемше-влаклан ешартыш шинчымашым налаш чыла йӧн уло. Педагог-шамыч утарышын курсшым эртеныт. Занятийлам Михаил Васильевич Алмакаев да молат вӱдат.
– Ӱдыр-рвезе-влак икымше полышым пуаш тунемыт. Тидлан кӱлешан оборудованийым наледыме. Рацийым, жгутым да моло вес арверым налаш выпускник-влак полшеныт. Тунемше-шамыч мастер-класслаште, проект пашаште чолгалыкыштым ончыктат. Тӱрлӧ таҥасымашке ушнат да ончыл верыш лектыт. Ӱдыр-рвезе-влаклан пожар эстафетыште, вий-куатым тергыме упражненийлаште, кроссышто, кычалме-утарыме пашаште, чаракым сеҥымаште, илен лекме маршрутышто шкеныштым тергаш поснак келша. Школын лӱмжӧ районышто веле огыл, республикыштат чапланен, – ойла Н.В.Шабалина.
«Лӱдыкшыдымылык школ» селасе пожарный частьын пашаеҥже-шамыч дене пеҥгыде вашкылым ыштен. Пожар лӱдыкшӧ годым шкем кузе кучымо нерген мутланымашым эртарат. Вургемышт дене палдарат да писын чияш туныктат. Роҥго школышто пашам ыштыше педагог ден йоча-влак моло тунемме вер дене келшымаш кылым вияҥдат. Туныктышо-шамыч икте-весе дене паша опыт дене пайлалтыт. Августышто Запорожский область гыч уна-влак толыныт. Тыгай толкын пеҥгыде койыш-шоктышан лияш да кеч-могай задачым кӱлеш семын шукташ туныкта.
Снимкыште: М.В.Алмакаев, школ директор Н.М.Шабалина, Н.В.Шабалина.
И.Речкинын фотожо.
