Кирилл Милютин 1-ше номеран Шернур школын 10-шо классыштыже тунемеш. Туризм, спорт дене кылым куча. «Лӱдыкшыдымылык школ» российысе йоча да самырык-влак мер толкынын регионысо пӧлкажын да Школьник-влакын российысе толкыныштын чолга еҥже.
2020 ийыште «Смена» всероссийский йоча рӱдерыште «Мастерская лидеров» сменыште канен. Тений сентябрьыште «Артек» тӱнямбал йоча рӱдерыште эртаталтше «Территория Успеха» фестивальыште лийын.
– Визымше классыште тунеммем годым Школьник-влакын российысе толкыныштын слётышкышт икымше гана логалынам. Лач тунам ты толкын йоча-шамычлан ончыкылык корным чын ойыраш полшымыж нерген умыленам. Тӱрлӧ конференцийыш, конкурсыш ушнаш тӱҥалынам. Куд ий жапыште ик слётымат коден омыл манаш лиеш, – ойла Кирилл. – «Импульс» республикысе профильный лагерьыш кажне ийын коштам. Сандене лагерь нерген поро шомакым каласыме шуэш. Тудо моло лагерь деч ойыртемалтеш. Уста туныктышо, вожатый-шамыч калык дене пашам ышташ туныктат, лидер-влакым куштат. Нунылан таум каласем. Туштак мый вожатый-шамычын курсыштым эртенам. Тиде тунеммаште да ончыкылык пашаште моткоч кӱлешан.