Шукерте огыл Пӧтъял школышто профессор, биологий шанче доктор, Марий Эл Республикысе шанчын сулло пашаеҥже Н.В.Абрамов лӱмеш «Росток» школысо шанче-практике конференций эртаралтын. Николай Васильевич тале туныктышо, мер пашаеҥ, редактор лийын. Марий кундемысе кушкыл-влакым шымлен, книгамат возен.
Меат шымлыме пашалан шӱман улына. Эн ончыч класс дене почвым физике да химий могырым шымленна. Ты мландыште шожын кузе кушмыжым эскеренна. Тиде паша дене школысо конференцийыш Ксения Озеркина дене пырля ушненна (снимкыште) да сеҥышыш лектынна. Мемнан пашанам Николай Васильевичын шӱжарже Елизавета Васильевна Фёдорова аклен.
Вара «Мой первый шаг в науку» Юл кундемысе шанче форумыш миенам да кумшо верыш лектынам. Кумылем нӧлталтын, эше утларак шымлаш шӱмаҥынам.
Яна ТИМОФЕЕВА.
Волжский округ.
Фотом школ архив гыч налме.
