Руш литератур дене почеламутым наизусть тунемаш пуэныт. Ты паша неле огыл, но мый класс ончыко лектын каласкалаш вожылам. Тыгодым кӧ полшен кертеш? Ава! Чонышто нумалме нелытым тудлан почын пуышым, ни мом шым шылте.
Авам тыге каласыш:
– Эргым, почеламутым каласкалымет годым театрысе артистла кояш тырше. Пуйто ончышо-влакым сылнын лудмет дене куандарет.
Руш литератур урок. Йолташем-влак икте-весе почеш почеламутым каласкалат: кӧ сайын, кӧ монден колта, кӧ гын, пулемётла тототлен, вашкерак утлынеже. Туныктышо мыйым ӱжӧ. «Ну, артист, рашкалтарен пу-ян!» – шонымаш дене доска деке лектым. Шонем, пуйто М.Шкетан лӱмеш Марий кугыжаныш драме театрын сценыштыже шогем. Калыкше шуко-шуко, чыланат ӱмбакем ончат. Шучко лийын кайыш. Кенета пылышемлан авамын йӱкшӧ йоҥгалте: «Ит лӱд, шарналте мыйын каҥашем!»Ты годым туныктышын «Иванов, ямде улат мо?» манын йодмыжо урокыш пӧртылтыш.
– Ямде! – вашештыме деч вара нимомат ом шарне. Кенета уло класс рӱж совым кыраш тӱҥале.
– Шич, – туныктышо мане, – «визытаным» шындем.
Александр ИВАНОВ.
Морко, Коркатово.
