Советский район ӧрша школышто 37 ӱдыр-рвезе тунемеш. Кажныже молан-гынат кумылан: икте сайын сӱретла, весе яндарын мура, кумшо талын кушта. 1-4-ше класслаште тунемше-влак сылнымутлан поснак шӱман улыт. Нуно «Ший оҥгыр» кружокыш коштыт. Тудым марий йылмым да литературым туныктышо Р.Г.Антропова (снимкыште – йоча-влак дене пырля) вуйлата.
– 1995 ийыште ӧрша школышто туныкташ тӱҥалынам. Шке предметет верч чонет йӱла, пӱжвӱдетым йоктарет гын, курыкымат савыраш лиеш улмаш. Мый изинек сӱретлаш йӧратем. «Ямде лий» газет дене йочам годсек кылым кучем. Садланак «Ший оҥгыр» кружокым почаш кумыл лектын. Авам Лидия Ивановна Павлова Марий Турек район Арбор школышто пашам ыштымыж годым тыгай лӱман кружокым вӱден. Тудын сомылжым умбакыже шуем, – ойла Роза Геннадьевна.
Йоча-влак заметкым, синк-вейным возаш, кроссвордым, филвордым, ребусым ямдылаш тунемыт. Мотор сӱретым шкеак келыштарат. Кружокын пашажым саемдаш марий газет ден журнал-влак полшат. «Ямде лийым» поснак куанен шергалыт. Йоча-шамыч, шке лӱмыштым газетыште ужмеке, моткоч йывыртат. Р.Г.Антропова савыкталше пашаштым, пӱчкын луктын, посна альбомышко чумыра. Возкалаш, сӱретлаш кумылан йоча-влакым мокталтен, построенийыште «Ямде лийым» пӧлекла.
– Школышко кажне кечын кугу кумыл дене ошкылам. Пайремышке кайымыла чучеш. Йочан усталыкшым ужын моштен, ончыко вӱдаш тыршем. Пырчым жа-пыштыже ӱдет гын веле шинчымаш дене темше поян лектышым вучен кертат, – ойла Роза Геннадьевна.
