«Защитники Отечества» фонд «Памяти героев верны!» всероссийский усталык конкурсым иктешлен. Специальный военный операцийын событийже, участникше-влаклан пӧлеклалтше «Авторын фотографийже» таҥасыште Волжский район Памар школышто 1-ше классыште тунемше Аврора Баринова (снимкыште) сеҥышыш лектын.
Ӱдырын ача-аваже моткоч чолга улыт. Евгений Александрович Донбассыш гуманитар полышым кудло утла гана наҥгаен. Куд ганаже еш дене миеныт. Венера Ринатовна маскироватлалтме сеткым пидеш.
– Донбассыш икымше гана мийыме годым Первомайск олаште конкурслык фотом войзенна. Тушто чыла пудештын, сӱмырлен. Шуко пачашан пӧртын ик лукшо уке гынат, еҥ-влак тушто илат. Тиде мемнам моткоч ӧрыктарен. Авроран пӧртым войзаш кумылжо лектын. Ты фотом конкурсыш колтенна, – ойла Венера Ринатовна.
Аврора истребительын лётчицыже лияш шона. Кумирже – «Белая Лилия», Лидия Владимировна Литвяк. Чолга ӱдырын кугу шонымашыже тек шукталтеш.
Христина АЛЕКСАНДРОВА.
Фотом еш архив гыч налме.
