Морко районысо Чӱкшӧ курык Марий Элыште эн кӱкшӧ верлан шотлалтеш. Тушто верысе калыкат, турист-влакат канаш, жапым пайдалын эртараш йӧратат. Кугу курык гыч Морко кундемысе кажне ял коеш, манаш лиеш. Мардеж уло вийже дене пуал колта гын, чоҥештыметак шуэш. Тиде амал дене ты верыште «Юж кайык» республикысе фестивальым икымше гана эртаренна.
Тышке районысо школла да Йошкар-Ола гыч ӱдыр-рвезе-влак (снимкыште) ушненыт. Нуно могай гына юж кайыкым ыштен ямдылен огытыл?! Икте Микки Маус сӱретаным, весе миньонаным, кумшо лываным. Южышт марий тӱр дене сӧрастареныт. Сӧрастары-ме гына шагал, тудым чын ыштен моштыман. Тидын нерген 2-шо номеран Морко школ пелен «Техническое творчество» кружокым вуйлатыше Э.А.Делянов умылтарыш:
– Юж кайыкым пеш чаткан ыштыман. Нелытшым, куэмжым, кок могырым тӧр улмыжым шотыш налман. «Почшымат» кӱлеш семын келыштарыман. Тасмам пижыкташ лиеш, тушто изишак нелыт лийшаш. Юж кайыклан нӧлталалташыже мардеж кӱлеш. А ышташ неле огыл, кумыл гына лийже.
Ӱдыр-рвезе-влак юж кайыкым черет дене колтеныт. Йолташыштын «кишкыштын» кӱш чоҥештымыштлан куанен кычкыреныт. Нӧлталалтын кертын огыл гын, пырля тургыжланеныт, полшаш тыршеныт. Иктешлымеке, 2-шо номеран Морко школышто тунемше Василий Разманов сеҥышыш лектын. Нуж-Ключ школ гыч Даниил Филиппов кокымшо лийын, Морко район Арын школ гыч Нина Яковлева – кумшо. Йошкар-Оласе 24-ше номеран школышто тунемше Артём Иванов юж кайыкым марий тӱр дене эн сылнын сӧрастарымыж дене ойыртемалтын. Сеҥыше-влаклан дипломым да чапле пӧлекым кучыктымо.
Тиде кечынак Чӱкшӧ курыкышто «Покорение Чукшинской горы» спорт фестиваль эртаралтын. Тудо Украиныште эртаралтше спецоперацийын участникше-влак Виктор Яковлев ден Руслан Семёновым шарныме лӱмеш лийын. Тушто «Ямде лий» газетын чолга юнкоржо-влакымат ужаш куанле ыле.
