17 майыште Медведево районысо Сосновый Бор посёлко воктене пушеҥгым шынденна. Тудым «Азбука жизни» автономный коммерческий огыл организацийын «Возрождение лесов в Марий Эл» мер проектше радамыште эртарыме. Ты поро пашашке меат ушненна: кочай, авай, Варюша шӱжарем да мый изи «бригадым» ыштенна. Кочам лакым ыштен, мый да Варюша шӱжарем изи пӱнчӧ-влакым шынденна, авам ведрам нумалын. Питомникыште ончен куштымо икияш пӱнчӧ росота-влакым шым гектарыште вераҥденна. Чылаже – 14500 ончыкылык пушеҥге! Ме шкенан «бригадына» дене ныл кугу ведра изи пӱнчым шынденна. Поро пашам моткоч сайын виктарыме лийын. Пашалан кӱлшӧ чыла арверым ончылгоч ямдыленыт. А сомылым мучашлымеке, чылам тутло кочкыш вучен: шемшыдаҥ пучымыш, кинде, шокшо чай, колбаса ден кияр, а кампеткыже-е-е – ойлыманат огыл! Илен-толын, шындыме ньога пӱнчына-влак мемнам веле огыл куандарыше кугу пушеҥгыш савырнат. Ме шкенан чодыранам, илышым сӧрастарыше да шуйдарыше ужар поянлыкнам, аралы шаш улына!
Драгояр ЯНАЙ.
Медведево, Арбан.
Снимкыште: Варюша шӱжарем, мый да кочай.
Вера ГЕРАСИМОВАН фотожо.
Редакций деч: «Азбука жизни» НКО-лан да Марий Элыште ты суапле сомылым вуйлатыше Оксана Айтовалан кугу таум ойлена.
