Изи Какшан серыште верланыше олана моторлыкшо дене ойыртемалтеш. Тудын сӧраллыкшым ончаш ятыр кундем гыч идалык мучко турист-влак толыт. Марий лӱман ола Рязань гыч Леоновмыт ешын (снимкыште) кумылжым савырен.
– Йошкар-Ола чынже денак пеш сӧрал, яндар. Эҥерӱмбалне коштмо годым могай гына пӧртым, чапкӱм от уж! Мыланем фонтан-влак келшышт. Патриарший площадьыште гын, 12 апостол лекмым пеш вучышна. Тымарте тыгайым ужмо огыл. Тудо мотор да ӧрыктарыше, – ойла Анастасия.
– Мыланем Чарла кремль оҥайын чучо. Тудо историй деке мемнам лишемда, – ешарыш Павел. Чынак, Йошкар-Ола эреак кушкеш, пеледеш да тӱзлана. Ойыртемалтше тӱсшӧ, шкешотан тӱвыраж дене калыкым сымыстара. Шочмо кечет дене, Йошкар-Ола!
Жанна ФЕДОРОВА.
