Кӧ тыгай пионер? Пионер – тиде ончылно ошкылшо, пашам эн ончыч ыштыше. Пионер еҥын чоныштыжо сай кумылым, шкенжым калыклан, калыкым шкаланже почеш. Тудо йолташыжлан, шочмо кундемжылан, шочмо пӱртӱсыжлан полыш кидым шуялташ эре ямде. Пионер чын, келшымаш, чап верч шогышо, лӱддымӧ, шкеж почеш йолташыже-влакым наҥгаен кертше да кеч-могай пашам ышташ ямде улшо.
Таче пионер-влакым те чӱчкыдын ужыда? Уке, очыни. А Йошкар-Олаште улыт. 1994 ийыште 14-ше номеран гимназий пелен «Стелла» пионер дружине почылтын. Латин йылме гыч кусараш гын, «шӱдыр» манме лиеш. Тышке 5-11-ше классласе 200 наре коштеш.
Дружиным гимназийын директоржо В.Н.Цепелев вуйлата. Председательже – 11-ше классыште тунемше Екатерина Иванова. Куд направлений дене пашам ыштат. Школышто да олаште эртаралтше тӱрлӧ мероприятийышке ушнат да шкеак эртарат. Кажне ийын йоча-влак Сеҥымашын XXX идалыкше лӱмеш тӱвыра полат ончылно лум гыч тӱрлӧ фигур-влакым ыштат, гимназийышт ончылно идалыкын символжым ий гыч чоҥат. Шошым субботникыш ушнат. Пионер-влак макулатурым погат, ветеран-влак деке полышкалаш коштыт. Эн кугу мероприятийышт – 1 Майлан парад. Кажне ийын эн чолга ӱдыр-рвезе-влак шествийын колонныжым вуйлатат. А 19 майыште, Пионерийын кечынже, кажне кумылан еҥ (кеч йоча, кеч кугыеҥ) пионер-влак радамыш ушна.
Кажне йочан пионер знакше уло. Организаций, шке гыч знакым ыштен, эн чолга пионер-влаклан пуа. Знакын дизайнжым йоча-влак шке келыштарат.
Эре ямде пионер
