Звенигово район Выльыпсола ялыште илыше Ивановмыт ешын мӧҥгысӧ книгагудыжо поян. Кугурак икшыве – Виктория (снимкыште) – йомакым йӧрата. Тудо Морко район Коркатово лицейыште 5-ше классыште тунемеш.
– Шукерте огыл мыскара сынан «Изак-шоляк-влак» йомакым лудынам. Тудо кугуракым пагален, изиракым чаманен, икте-весе дене келшен илаш туныкта. Произведенийын геройжо-шамыч дене пырля пуйто мыят поро пашам ыштенам, тӱрлӧ вере миен коштынам да у йолташым вашлийынам, – манеш ӱдыр.
Куд ияш Вероника Звенигово район Керебеляк тӱҥ школ пеленысе йочасадыш коштеш. Акаж семынак литературын ты жанржым ойыра. Вет йомакын юзо тӱняштыже ӧрыктарыше айдеме, янлык-влак илат. Лийын кертдыме сомыл тӱҥалтышым налеш да лудшым я куандара, я герой верч тургыжландара, я вучыдымын лӱдыкта. Шукылан туныкта.
Кок ияш Арина мотор сӱретан книга-влакым кумылын лаштыкла, аваже да акаже-влаклан лудыкта. Надежда Васканован ямдылыме «Йочалан – марла» икшывым тӱрлӧ могырым вияҥдаш полшышо картычке-шамыч почеш мут-влакым тунемеш.
Книгам лудмашын пайдаже нимучашдыме. Садлан ты сомыллан кумылаҥден моштыман. Ты ой дене ака-шӱжар-влакын авашт Алеся Валериевна тӱрыснек келша.
– Примерым ончыктыман. Кугыеҥлан икшыве пелен книгам лудаш шичман. Йӱлаш пурыжо манын, тидым кече еда ыштыман. Сылнымутым ийготлан келшышым ойырыман. Шукерте огыл Вика ӱдырем дене «Марла лудына» марафоныш ушненна. Икоян, сылнымутым йӧратыше еҥ-влак дене палыме лийынна, – ойла Алеся Иванова.
Оля МАЙКОВА.
Авторын фотожо
