13 июньышто Йошкар-Олаште фитнес-аэробике дене «ФИТНЕС лето» фестиваль эртаралтын. Тушко У Торъял посёлко гыч куд команде (снимкыште) ушнен. Сеҥымашыштым шотлен от пытаре!
7-9 ияш-влак коклаште степаэробике дене София Москвина ден Анастасия Пузырникова кокымшо верым сеҥен налыныт. А Каролина Петухова ден Анастасия Кропотова кумшо лийыныт. Тыгай ийготан-шамыч коклаштак «Феникс» команде чыланыштым ончылтен. 10-13 ияш-влак коклаште «Триумф» команде той медальым налын. А «Эффект» команде куштымо да степ-аэробике дене мастарлыкшым ончыктен да сеҥымаш дене куандарен.
Ӱдырна-влак фитнес-аэробике дене кылым кучат. Занятийыш уло кумылын коштыт. А сеҥышыш лекмеке, шинчашт кузе йӱла! Тренерышт Кристина Николаевна Созонова моткоч мастар. Тудын полшымо дене икшывына-шамыч кугу кӱкшытыш шуын кертыт.
Валентина ЯТМАНОВА, Любовь РУМЯНЦЕВА.
У Торъял посёлко.
Фотом еш архив гыч налме.
