Йоча-влак, шокшо игече шогымылан кӧра ялысе пӱяшке, ерышке, эҥерышке йӱштылаш вашкеда. Шарныза: сайын ийын моштеда гынат, ача-ава але кугыеҥ-шамыч деч посна вӱд воктеке ида кай. Пырля лийме годымат ятыр правилым шотыш налман. Тидын нерген Россий МЧС-ын Марий Эл Республикысе тӱҥ управленийжын Йошкар-Оласе отделенийжын ГИМС (Государственная инспекция по маломерным судам) рӱдержын инспекторжо В.С.СТРЕЛЬЧУК каласкала:
– Палыдыме верлаште йӱштылман огыл. Тудын келгытшым огыда пале. Вӱд пундашыште тӱрлӧ ате, воштыр да молат лийын кертыт. Кызыт яллаштат йӱштылаш верым келыштарат: вӱдышкӧ волаш изирак пашмам але тошкалтышым ыштат, сер воктене каналташ йӧн уло, вургемым вашталтен чияш изирак пӧртым чоҥат. Вӱдыш пурымо деч ончыч капкылым лывырташ икмыняр куштылго упражненийым ыштыман. Вӱдын температуржым шотыш налман. Тудо 20 градус деч шокшырак лийшаш. Кугурак ийготан йоча-влак вӱдышкӧ лудо гай вуйге пураш йӧратат. Тидлан сайын ийын моштыман. Жапымат шотыш налман. 30 минут деч утла вӱдыштӧ лийман огыл. Кугыеҥ-влак деч посна вӱдыш пураш лӱдыкшӧ. Вӱдыштӧ оҥа, пырня, пуэн овартыме матрас, орава камер дене ийын кошташ, модаш ок лий. Ӱдыр-рвезе-влак, нине ой-каҥашым шотыш налыда гын, уто лӱдыкшӧ лийшаш огыл.
