«Вӱд – тиде илыш», – маныт калыкыште. Туддеч посна кушкыл, янлык ден кайык-влакат, меат илен огына керт. Вӱдыштӧ ийын, капкыллан кугу пайдам налаш лиеш. Арам огыл изижат-кугужат кеҥежым йӱштылаш вашкена. Посёлкылаште, олалаште илыше ӱдыр-рвезевлак пиаланрак улыт. Нуно бассейныште идалык мучко ийын кертыт. Медведево посёлкысо «Витязь» йоча спорт клубышто Е.И.Логинова (Ямбердова) (снимкыште) чын да писын ияш туныкта. Екатерина Ивановна – полиатлон дене тӱнямбал классан спорт мастер. Иймашым спортын эн йӧратыме видшылан шотла. Ача-ава ден икшыве-влак, тургыжландарыше икмыняр йодышлан таче вашмутым муын кертыда.
– Иймашын пайдаже кугу. Капкыл пеҥгыдемеш, чогашыл, чытыш вияҥыт, нерв системе тырла. Шуэнрак черланаш, шкем сайынрак шижаш тӱҥалат. Кеч-могай ийготан икшывым ияш туныкташ лиеш. Тӱҥжӧ – кумылжо лийже, – ойла Екатерина Ивановна.
Яллаште тренер дене пашам ышташ йӧн уке гын, ача-ава-шамыч шке туныктен кертыт. Тыгодым йочан тазалыкшым шотыш налман.
– Иктылан иймаш пайдам конда гын, весылан эҥгекым ыштен кертеш. Мутлан, шӱм, опорно-двигательный аппарат дене кылдалтше чер-влак улыт гын, эпилепсий, йоча паралич, коваште инфекций палдырнат гын, ийман огыл, – умылтара Екатерина Логинова.
Эше теве мом шарныман: ӱдыррвезе-влак, сайын ийын моштеда гынат, кугыеҥ-шамыч деч посна вӱдыш ида пуро. Тӱткӧ лийза, илышдам аралыза!
Христина АЛЕКСАНДРОВА.
Фотом еш архив гыч налме.
