«Кугурак лиямат, гармонь дене шокташ тунемамак», – ойлен Артём Ягодаров «Ямде лий» газетын пашаеҥже дене ик мутланымаште. Шонымашкыже шуын. Кызыт тудо кугурак-влакымат мурыктен, куштыктен кертеш.
Артём Йошкар-Оласе 17-ше номеран школышто нылымше классыште тунемеш. Республикысе Марий тӱвыра рӱдер пеленысе «Падыраш» йоча ансамбльыште куд ияш гыч чолгалыкшым ончыкта. Марий сем почеш мурен-кушта, тӱмыр, совла, шалдырма дене (трещотка) шокта, шӱшпык дене шӱшка.
Гармоньым рвезе 3-4 ияшак кидышкыже налын. Чӱчӱжын, ачажын шоктымыштым ончен, нунын гай мастар лиймыже шуын. Икымше семым шке семынже тунемын. Варажым уста гармоньчо-влак Э.В.Петрова ден А.Л.Ермаков полшеныт. Мастарлыкшым Йошкар-Оласе музыкальный школышто вияҥден. Артёмын йоҥгалтарыме «Тау, кочаем» ден «Мый гармоньчо лийнем» мурыжо-влаклан клипым келыштареныт.
Чолга рвезылан «Идалыкысе муро – 2023» фестивальыште мурымыжо шарнымашеш чот кодын. Кугу сцене гыч «Тау, кочаем» (мутшо – Христина Александрован, семже – Светлана Яндукован) мурым йоҥгалтарымыже шукыштын чонышкышт логалын. Сценыш лекмеке, изиш тургыжланен, а вара шкенжым кидыш налын, шомак-влакым чонжо гоч колтен мурен.
– Эргым кидышкыже гармоньым чӱчкыдын налеш. Но кужу жап шинчаш ок йӧрате. Иктаж пашам ышта да гармоньжо деке пӧртылеш, шокталтен колта, – ойла Артёмын аваже Оксана Владиславовна. – Музыкальный школышко коштмыж годым балалайке да фортепиано дене шокташ тунемын.
Тек Артём умбакыжат чолга лиеш. Илен-толын, уста мурызо, гармонист, артист-влак дене пырля кугу сцене гыч мемнам куандараш тӱҥалеш.
Фотом еш архив гыч налме.
