12-15 июньышто Озаҥыште руш йылме дене тӱнямбал олимпиадын иктешлыше йыжыҥже эртаралтын. Тушто руш йылмым шочмо йылме семын огыл тунемше ӱдыр-рвезе-влак шинчымашыштым тергеныт. Олимпиадышке Российын 17 регионжо, Азербайджан, Киргизий гыч 203 тунемше ушнен.
Марий Элын чапшым Морко район Унчо школ гыч Алеся Григорьева ден Кристина Ильина, Советский район Ӱшнӱр школ гыч Анастасия Медведева, У Торъял район Немда школ гыч Лейла Садовина араленыт. Нуным снимкыште ужыда. Кристина келге шинчымашым ончыктен да сеҥыше-влак радамыш лектын, Анастасия призёр лийын. Уста ӱдыр-влакым да нунын туныктышо-наставникыштым сеҥымаш дене саламлена.
Л.НИКОЛАЕВА.
Фотом Марий Эл Республикысе Образований да науко министерствын сайтше гыч налме.
