Ялыште паша идалык мучко шуко. Телым лумым куыман, шошым мландым кӱнчыман, кеҥежым йыраҥыш вӱдым шавыман, шыжым пакчасаскам поген налман. Икманаш, кажне кече – спорт. Ӱдыр-рвезе-влак изинек, пашам ыштен, виян, пеҥгыде капкылан кушкыт. Садлан спортышто нелылыкым огыт шиж да кугу сеҥымашке куштылгын шуыт. Оласе йоча-шамычат вараш огыт код. Ялышке тунемаш куснышо, спорт дене пеҥгыде кылым кучышо Звенигово район Эсмекпляк школын 9-ше классыштыже тунемше Дарья Яковлева (снимкыште тренерже дене пырля) дене палымым ыштем.
– Мый кумшо классыште тунеммем годым спортлан шӱмаҥынам. Туран лӱйкалаш тунемынам, биатлон дене кылым кученам. Ола гыч ялышке илаш куснымеке, тыгай йӧн йомын. Кызыт мый волейбол дене модам, куржталам, – ойла Даша.
Ӱдыр арнялан кум-ныл гана тренировкыш коштеш. Физкультурым туныктышо В.А.Белкин ончыко лӱдде каяш, сеҥымашке шуаш тарата. Лектыш изи огыл. Тений майыште эртаралтше «Лӱдыкшыдымылык школ» таҥасымашке команде дене ушненыт да районышто сеҥышыш лектыныт. Физкультурникын кечыжлан пӧлеклалтше таҥасымаште кумшо лийын. Пистолет, винтовко гыч лӱйкалымаште ятыр гана ойыртемалтын.
– Спорт кумылым нӧлта, ойгым мондаш полша. Чонемлан биатлон лишыл. Олашке тунемаш кайымеке, тудын дек уэш пӧртылаш йӧн лиеш, шонем. Спорт кӧргӧ виян лияш, нелылыкым куштылгын сеҥаш туныкта. Тудын пайдаже ятыр, садлан шке таҥаш ӱдыр-рвезе-влакымат спорт дене кылым кучаш ӱжам, – ойла Даша.
