Марий Эл Республикысе тӱвыран сулло пашаеҥже, журналист, литератор, краевед, Н.А.Заболоцкий лӱмеш сылнымут премийын лауреатше Р.А.БУШКОВЛАН 31 январьыште 65 ий темеш.
Р.А.Бушков Марий Турек район Элксе почиҥгаште шочын. Йошкар-Оласе 1-ше номеран музыкально-художественный школ-интернатыште тунеммыж годым «Ямде лий» газет дене пеҥгыде кылым кучен. «Пионерская правда» газетын, «Огонёк», «Турист» журнал-влакын эртарыме конкурслаште сеҥышыш лекмыжлан «Артек» тӱнямбал пионер лагерьыш, Польшыш, Болгарийыш каяш путёвкым кучыктеныт. Руслан Аркадьевич паша корныжым 1975 ийыште «Ямде лий» газетыште тӱҥалын. Совет Армийыште службым эртыме деч вара Озаҥ оласе кугыжаныш университетыште журналистике пӧлкаште тунемын, шинчымашыжым аспирантурышто келгемден. Озаҥысе да Марий кугыжаныш университетлаште, Озаҥысе ветеринар институтышто пашам ыштен. Кызыт Руслан Аркадьевич – сулен налме канышыште. Туге гынат самырык-влакым журналистике пашалан шӱмаҥда, шанче сомыллан утларак жапым ойыра. 2017 ийыште савыктыме «Рассвет земли Онара» книгажым ешарен, тӧрлен да 2021 ийыште уэш печатлен луктын. Марий краевед-влак ты савыктышым Марий Турек районын тӱвыраже да эртыме корныжо нерген энциклопедий сынан пашалан шотлат. Тушто Марий кундем нерген палыдыме ятыр историй фактым муаш лиеш. «Школышто тунеммем годым «С чего начинается Родина» муро кумдан чапланыше ыле. Мурышто икымше вашмут тыгай: «С картинки в твоём букваре», – ойла Руслан Аркадьевич. – Марий йоча-влаклан тыгай букварьжым кӧ да кунам ямдылен? Йодышлан вашмутым шанчыеҥ лиймеке веле пален налынам. Йоча-влаклан шуко сӱретан икымше марий букварьын эртыме корныжо нерген оҥай факт-влакым уэш савыктыме «Рассвет земли Онара» книгашке ешаренам. Тыгай букварьым йылмызе, просветитель Г.Г.Кармазин 1912-1913 ийлаште Марий Турек район Кокла Китне тӱҥалтыш школышто пашам ыштымыж годым ям-дылен. Тушко Гурий Гаврилович лӱмынак букварьым чумыраш толын улмаш. Мый кызыт кугешнен палемдем: ты школышто кочам Г.А.Бушков тунемын да букварьын авторжо дене палыме лийын».
Р.А.Бушков – историй науко кандидат, Военно-исторический наукын Россий Ака-демийжын член-корреспондентше, Юл кундемысе калык-влакын этнокультурышт, историй да литератур краеведений дене 200 пашан, тыгак руш да татар йылмыла дене 15 книган авторжо.
