Марий Левитан

Москошто «Лига лекторов» да «Школьная лига лекторов» всероссийский конкурслам иктешленыт. 3-шо номеран Звенигово школышто   11-ше классыште тунемше Данила Морозов Сталинград кредалмаш нерген лекцийже дене сеҥышыш лектын. Рвезын наставникше педагогике шанче кандидат, Нижний Тагил оласе кугыжаныш социально-педагогический институтын доцентше С.С.Луткин лийын. Сеҥыше-влакым саламлыме годым вӱдышӧ Данилам «Человек-Левитан» манын ойлен.

Историйым да обществознанийым туныктышо, школ директор Светлана Валерьевна Созонова шуко полшен. Тудын поро шомакше, эҥертыш улмыжо сеҥаш ӱшаным шочыктеныт. Мыланем «Знание» россий обществын лекторжо лӱмым пуэныт да шунгит-кӱ гыч шарнымаш кубым да «Больше, чем путешествие» программе почеш канаш сертификатым кучыктеныт. Тиде кугу пиал да чап, – ойла Данила.