Морко кундемым ожнысек талант памаш маныт. Тудо кызытат шолеш. Ӱдыр-рвезе-влак С.Чавайнын, В.Колумбын, М.Казаковын тӱҥалме пашаштым умбакыже шуят. Тидым «Ямде лий» газетын 90 ияш лӱмгечыжлан пӧлеклалтше «Сылнымут шошо» районысо сылнымут пайремыште раш ужынна. Тудым ме, «Ямде лий», «Морко мланде» газет редакций-влакын да Морко районысо туныктымо пӧлкан пашаеҥышт, посёлкысо 2-шо номеран школышто эртаренна. Погынымашке кажне гаяк школ гыч тунемше-влак туныктышышт дене пырля ушненыт. Пеленышт почеламутыштым, заметкыштым, ойлымашыштым конденыт да нунылан акым налыныт. «Мутмодыш аланыште», «Журналистикыш унала» секцийлаште паша шолын.
«Сылнымут шошо» сылнымут пайремым Морко районысо туныктымо пӧлкан методике рӱдержым вуйлатыше С.Л.Александрова почын:
– Тиде семинар, пайрем тӱрлӧ школышто кок ийлан ик гана 2013 ий гыч эртаралтеш. Мо сылне шомак дене кылдалтын, тудо эре чоным «чыгылта», вургыжландара, куандара. Сылнымут – шошышто, чонышто, тӱняште. Тыгай вашлиймаш могай-гынат саскам пуа манын ӱшанена.
Марий шомакын, сылнымутын вийыштым изинек шижын кушкаш школ веле огыл, «Ямде лий» газетат полша. Садлан йоча-влак пайрем тӱҥалтыште эн ончыч газетын эртыме корныжо, кызытсе илышыж дене палыме лийыныт. Вара чоныштлан келшыше секцийым ойыреныт. «Мутмодыш аланыште» почеламутым чын возаш тунемыныт. Пашаштым доска ончылно лончыленыт. «Журналистикыш унала» секцийыште журналистикын тӱрлӧ жанрже нерген мутланеныт, возымо пашаштым тӱшкан акленыт, интервьюм налын модыныт. Ӱдыр-рвезе-влакын сылнымутыштым иквереш чумырен, ончыкыжым сборникым савыктен лукташ шонымаш уло.
«Ямде лий» газетын историйже дене кылдалтше йодыш-шамычлан «Ушан юнкор» модышышто вашештеныт. Тушто Шордӱр школын «Вич парня», Морко посёлкысо 2-шо номеран школын «Кечыйол», Коркатово лицейын «Шонанпыл», Эҥерсола, Шӱргыял, Кожлаер школ-влакын «Висвис» командышт уш-акылыштым тергеныт. «Шонанпыл» команде сеҥышыш лектын. «Висвис» кокымшо лийын, «Вич парня» – кумшо. Сеҥыше да участник-влаклан пӧлекым кучыктенна.
