26 февральыште «Ямде лий» ден «Кугарня» газет редакцийлан пашаеҥыштын корнышт У Торъял район Немда кундемыш виктаралте. Ты кундемыште ятыр уста еҥ шочын-кушкын. Нунын коклаште – артист, драматург, мурызо…
Ончыч мемнам Немда кыдалаш школышто вашлийыч. Тачысе кечылан тушто 60 наре йоча уло. Журналист-влак, тӱҥалтыш класслаште тунемше-шамыч дене иквереш погынен, газетын пашаж дене палдарышна, йоча-влаклан викториным эртарышна (снимкыште). Ӱдыр-рвезе-влак, ӧрын шогыде, вожылде, марла сылнын почеламутым каласкалышт. Ӱшаныме шуэш, нунын кокла гыч шукынжо талантан землякышт семынак кундемыштым чапландараш тӱҥалыт.
Школ деч тораште огыл «Радуга» йочасад верланен. Тушкат пурен лекде чонна ыш чыте. Пурымеке, пырдыжым сӧрастарыше марий тӱр-влак вигак шинчалан пернышт. «Тугеже тыште марий шӱлыш озалана» шонымаш кумылым нӧлтале. Марий тувырым чийыше икшыве-шамыч поснак куандарышт. Икте ӧрыктарыш, Немда ялшотан илемыш 14 ял пура, но йочасадыш 9 йоча веле коштеш. Туге гынат, пашаеҥ-влак чот тыршат, марий шӱлышан мероприятийым, уста еҥ-шамыч дене вашлиймашым чӱчкыдын эртарат.
В.МАМАЕВА.
