– Авай, кеч-мом налаш эре окса кӱлеш. Мыняр окса кушко кайымым ачай дене кузе шотледа? – йодеш Мичу.
– Эргым, кажне еҥ шкаланже мо кӱлешым налеш. Сандене кажнын – шке роскотшо. А роскот тӱрлӧ лиеш. Айда пырля радамлена.
Жапын-жапын лекше роскот
Тудым тылзылан, пел ийлан але идалыклан ик гана тӱлыман. Мутлан, газым, тулым тылзылан ик гана оксам тӱлыман. Машиналан, пӧртлан налогым – идалыклан ик гана.
Кажне кечын лийше роскот
Кевытыште кочкышым але вес сатум налмына. Автобус але троллейбус дене кудалыштмылан тӱлыман – тидат роскот.
Иктаж-могай пагытлан але пайремлан кучылтмо роскот
Мутлан, 1 сентябрьлан тыланет у школ формым налынна. У ий пӧлекым налаш шагал огыл окса кӱлеш. Ялыште телылан пум ямдылынет – оксам тӱлыман.
Ончыкылыклан погымаш
Тиде иктаж-мом шонен пыштымым шукташ кучылтмо окса. Тидлан оксам кужу жап погена. Мутлан, отпуск жапыште теҥыз воктеке каяш, але пачерым олмыкташ.
Вучыдымо роскот
Ешыште иктаж-кӧ черланыме годым тыгай роскот лектеш. Ачатын машинаже пудырга гын, адак вучыдымо роскот лиеш.
Роскот нерген умылымашнам айста тергена. Кудыжо могай роскот?
1. Таче почтышто «Ямде лий» газетым нальым.
2. Вашке теле толеш у ечым налын ямдылыман.
3. «Ямде лий» газетлан 2023 ийын икымше пелийжылан подпискым ыштышым.
4. Ручкам пудыргымылан кӧра весым нальым.
5. Кружокышто ешартыш шинчымашым налмылан ойырымо окса.
