Мый Марий кундемем дене кугешнем да тудым «Онарын мландыже» манам. «Молан Онарын?» манын йодыда гын, кугешнен каласем: Онар – марий калыкын ик эн патыр да виян талешкыже.
Мыйын Токтарсола кундемемат Онар дене кылдалтын: Онар пӱя, Онар лӱмеш школ, колхоз, стеле. Тӱҥ уремыште Д.И.Онарын лӱмжым нумалше школ торашке волгалтеш. Даниил Ильич кугу капан, виян, патыр, ушан да таза лийын. Телым ял воктене верланыше пӱяште капшым шуарен, ече денат талын коштын. Эше тудым калык поро пашаж дене шарна. Онар ял калыкым тарватен да чодыраште пырням ямдылен, у школым нӧлташ негызым пыштен. Тиде школышто тудын пелашыже да кок эргыже туныктышылан пашам ыштеныт, а шкеже школ вуйлатыше лийын. Тудым курымеш шарнаш манын, коло кок ий ончыч школлан Онарын лӱмжым пуымо.
Тудын поро пашажым эргыже Геннадий Даниилович умбакыже шуэн. Москосо геодезий институтым тунем лекмеке, метром чоҥымаште инженерлан пашам ыштен. Кугу Ачамланде сар деч вара ешыж дене Токтарсолаш пӧртылын, верысе школышто математикым туныктен. Тудын ойжо да проектше почеш кугу пӱя ышталтын. Тудым «Онар пӱя» манаш тӱҥалыныт.
Ялыш пурымаште «Онар-Токтар» шарнымаш стелым вераҥдыме. Тудо уна-влакым шкеж деке ӱжеш.
Родион НЕБОГАТИКОВ.
У Торъял округ.
