Кажне айдеме шочмо верже нерген палышаш. Мыят Памашъялемын эртыме корныжым шергал лекташ да тачысе кечыжым келгынрак шымлаш кумылаҥынам. Садлан кугурак ийготан-влак, историйым туныктышо Светлана Алексеевна Афанасьева, книгагудо пашаеҥ-шамыч дене мутланенам. «История сел и деревень Республики Марий Эл. Мари-Турекский район» книгаште ятыр уверым муынам, интернетыште кычалынам.
Марий Турек район Карлыган ял шотан илемысе шым ялым, Толтенурым, Лопым, Павайнурым, Чоманэҥерым, Кукуремым, Лӱсэҥерым да Памашъялым, Арбор кундем маныт. Памашъял эрвел могырышто, Татарстан Республик деке лишке, верланен. Ончыч тудо Шургунур маналтын. Озаҥ губерний гыч тышке илаш куснышо-влак тудым шкеныштын йӱлен пытыше ялышт семын Памашъял манын лӱмденыт.
1816 ийыште ялыште 11 сурт лийын, 1940 ийыште – 37, а 2000 ийыште – 46. 1997 ийыште газым пуртымо. Ял кушкеш. Самырык-влак тораш каяш огыт вашке, тыштак илаш кодыт да у сурт-оралтым чоҥат. Кызыт 140 еҥ ила. Ик кевыт пашам ышта. Верысе калык сатулан южгунам Карлыганыш але Татарстан Республикысе Ципья селаш коштеш. Кидмастар-влак ятырын улыт. Мутлан, Сергей Васинкин – тале сварщик, Илья Платунов пу гыч тӱрлӧ арверым устан пӱчкеда.
Ялын старостыжо Алексей Борисович Афанасьев шочмо верна тӱзланыже, илаш йӧнан лийже манын тырша. Шукерте огыл тӱшка вий дене корным олмыктеныт, уремым электротул дене волгалтареныт. Ял калык поро, паша годым икте-весылан полша, пайремым рӱж пайремла.
Ярослав ИВАНОВ.
Марий Турек, Арбор.
Снимкыште: Ярослав – историйым туныктышо С.А.Афанасьева дене пырля.
Оля Майкован фотожо.
